Aue maria.

MOther of god whiche
hast co~ceyued & borne
our sauyour Iesu by vertue
of ye holy goost without sede
of man, perpetually abydynge
in holy virginite / praye for
me, that I may receyue by
inly inspiracion, wysdome &
grace of his greate mercy /
and with clene herte perseuer
in ioyful seruyce in hym
and the. Alleluya.

Aue maria.

Moder of god which dyd
beare in thy blyssed wombe
our sauyour Christ Iesu fro
nazareth in to ye mou~taynes
to visyte thy cosyn Elizabeth
praye for me yt I may beare
my lorde god braced in my
hert with perfyte loue & charite
in to the mounte of contemplacio~
of his moost excellent
diuinite. Alleluya.

Aue maria.

Moder of god which dyd
brynge forth our sauyour in
his blissed natiuite wtout anguysshe,
payne or blemysshe
in thy virginite / good lady
pray for me yt I may brynge
forth the gloryous fruyte of
vertue to the synguler laude
and honoure of hym and
the. Alleluya.

Aue maria.

Moder of god which dyd
giue our sauiour souke with
most dulcet mylke of thy virginall
brest, pray for me that
I maye here be fedde with
swete deuocion / reme~bryng
the passyon of his humanite
& after with fruicyon of his
godhede in eternite. All~a.

Aue maria.

Mother of god which did
lappe thy lytel swete babe in
clothes / and bytwene two
beestes i~ a crybbe layde hym
in hey, praye for me that my
naked soule may be lapped
in drede & loue of my lorde
god & the / & that I may oft
remembre my flesshe is but
yonge & hey in this crybbe
of mortalitie. Alleluya.

Aue maria.

Mother of god, to whom
the melodyous quere of aungels
dyd synge with greate
solempnite
Gloria i~ excelsis
for ioye of his byrth / pray for
me that I may gyue louyng
with the elect chyldren euerlastyngly /
for that he hath taken
for our saluacion flesshe
and bloode / and wolde be
borne of the. Alleluya.

Aue maria.

Moder of god whom the
shepeherdes by co~maundement
of the au~gell after his
natiuite dyd seke, & founde
hym in Bethleem poorely lyinge
in a crybbe / pray for me
that I may take for his loue
pouerte paciently with tribulacion
of this lyfe / bothe bodyly
and goostly. Alleluya.

Aue maria.

Moder of god incarnate
of the / circu~cised & called Iesu
the .viij. day after his natiuite /
praye for me that my
herte may be circu~cised fro
euyll thoughtes, synfull desyres,
offendyng hym & the /
and that I may by holy lyuynge
deserue the name of
a true chrysten man in this
vale of mysery. Alleluya.

Aue maria.

Moder of god to whom
the thre kings~ wt great reuere~ce
dyd offre golde / myrre /
and frankensence / pray for
me that I may haue to god &
man perfyte charite / in myselfe
a clene hert by ye vertue
of chastite / & yt I may gyue
example of vertue in euery
felyshyp yt I shall be. All~a.

Aue maria.

Mother of god whome yu
dydest present in his humanite
in to the te~ple / bearyng
hym ful swetely / pray for me
that whan my soule shall be
seperate fro my body, I may
be presented to my lorde god
in the estate of grace, by mediacion
of the. Alleluya.

Aue maria.

Hayle moost meke and deuout,
moost holy & blissed virgyn
Marye mother of god /
trone of ye trinite / ye preuyleged
se~tuary. Moost benigne
lady & mother of pite / the co~forte
of vertue / the singuler
refuge of synners / the ioye
of au~gels in the heuenly felicite /
the shynynge ge~me of
clene virginite, the refulge~t
sterre / the flourysshyng rote
of Iesse whiche as a swyfte
Egle in thy yonge age dyd
ascende by holy co~templacio~
of mynde to ye altitude of the
hygh diuinite / thou art the
flourdelice and the redolent
rose moost delectable to ye father
in trinite / vnto whom
thy moost excellent beautye
of soule and body was more
pleasaunt than all ye delytes
of paradyse. For thou hast in
all perfectio~ of nature & grace
suche meruaylous preemine~ce
that thou enclyned to ye wyll
of ye father to sende his sone
Iesu by holy incarnacion to
take flesshe & blode of the / &
suffre moost bytter paynes
to wasshe vs with his precyous
bloode from synne and
iniquitie / and reduce vs to
grace & goostly lyfe / wherfore
to hym & to the mother
of god be all maner of perfyte
ioye, blysse, solace, and
endles felicite.

Pater noster.

BLyssed mother of our
sauyoure whiche dyd
flee the cruell persecucion of
Herode whan ye chyldren of
Israel were slayne: & after
his deth returned to ye lande
of behest. Praye for me, that
in this exile & deserte that I
may escape the cruel persecucion
of my goostly ennemy.
And whan his power by the
grace of my lorde god is suppressed
I may returne to the
ioyes of paradise / and there
euer without ende dere lady
dyd dwell with the. All~a

Aue maria.

Blyssed mother of God /
whom yu dyd lese three dayes
in Ierusale~ the tyme of thy
pylgrymage / & sought hym
with greate sorowe / and fynally
dydest fynde hym in ye
temple disputyng with sage
doctours / praye for me that
I may kepe my soule in the
estate of grace. And if I lese
hym in any place by deedly
synne deseruing da~pnacion
I may fynde hym agayne
in the chirche of god by true
confessyon to my perpetuall
consolacyon. Alleluya.

Aue maria.

Blyssed mother of our sauyour /
which as a meke childe
was obedient to the / and
thou kepte hym with all tendernesse
of motherly pytye,
pray for me that I may kepe
my soule & my body obedie~t
vnto my lorde god & to the / &
to folowe ye doctryne of holy
chirche in my pilgrymage to
that heuenly cite. Alleluya.

Aue maria.

Blyssed mother of our sauyour /
whiche in flom Iordane
was baptysed of sayntly
iohn~
And after he shewed to hym sayenge beholde
the lambe of god which shall do away
the syn~e of the world praye for me
that my soule may be wasshed bi his grace
bi water of penau~ce fro~ deedly synne
Blissed mod~ of our sauiour which rasted
xl. dayes and .xl. nyghtes in the desert lyuyng
solytaryly and after dyd ouercome
the thre gret te~ptacyions of the goostli ennemy /
Pray for me that by the vertue of
abstyne~ce I may ouercome the spiryt of
glotony and lechery. Alleluya. Aue ma.
Blissed mod~ of our sauyour which at
thy request in the feest of Architryelyne
and to honour matrimony dyde chaunge
water in to wyne / pray for me that I may
chaunge lyfe and the desyres of erthly
pleasures & delectacio~s in
to the loue of god & the / and
of thy heuenly swetenesse &
consolacion. Alleluya.

Aue maria.

Blyssed mother of our sauyour
whiche healed ye sycke
& delyuered ye peple possessed
fro wycked spirytes, pray for
me yt my sycke soule may be
made hole by supplicacio~ of ye
and that myne aduersaryes
may be repressed, yt they preuayle
not against me. All~a.

Aue maria.

Blyssed mother of our sauyour
which reysed Lazar=9=
fro deth to lyfe; after he had
layne .iiij. dayes in his sepulture,
pray for me that I may
be reysed fro goostly deth of
yll desyres, yll wordes / euyll
werkes & yl customes, wher
by I haue deserued to be punysshed
perpetually. All~a.

Aue maria.

Blyssed mother of our sauyour
whose holy fete mary
magdalene wasshed with ye
teares of penau~ce. Also she
kyssed them deuoutly & dried
them wt her heare, & anoynted
them with swete oyntme~t /
& there by penau~ce she

B.i.

dyd wynne full remission of
all her synnes, pray for me yt
my fete of carnal affections
may be wasshed fro~ all fylth
of synne, & haue the~ anoynted
wt bawme of deuocion, yt
I may vnto the loue of god
myghtely clymme. Alleluya

Aue maria.

Blyssed mother of our sauyour,
whiche at ye maundy
afore his deth co~secrated the
holy sacrament of his blissed
body & his precyous bloode /
pray for me yt I may faythfully
receyue this sacrament of
his holy body to the encrease
of grace and victory of my
goostly ennemy. Alleluya.

Aue maria.

Hayle moost deuoute virgyn
& moder of our sauyour
doughter of ye eternal fader
& preelecte spouse of the holy
goost / the well of grace / the
condith of mercy / the quene
of heuen, the empresse of the
vniuersall worlde / example
of al vertue / the floure of solace /
ye frute of ioye / ye lyght
of heuen / ye gate of paradyse
the sepulture of our saluacio~
exalted aboue the seraphins
moost nygh the trone of the
gloryous trinite whose excellence
excedeth all y celestial
multitude / to behold thy presence
is ye great solace to synners
in the terrible houre of
deth. All the fendes feare ye
& fle at thy co~maundement.
For yu art the chosen sentuary
of our sauyour, in whome
he hath lyght to the perpetuall
saluacion of his elect people
glory with ineffable ioye be
to the euerlastyngly.

Pater noster.

DEre mother of Iesu
whiche in his great
agony afore his deth swette
water & bloode / prayenge to
the father on ye mount of olyuete /
pray for me that I may
oft reme~bre the great payne
of deth & ye moost cruell agony /
& dispose me so to prayer
and vertuous lyuynge, that
my soule may than be accept
to hym and to the. Amen.

Aue maria.

Blyssed mother of Iesu,
whom the iewes dyd take &
brought hym bounde lyke a
thefe to Ierusalem / there to
be iudged afore ye ministers
of the lawe / pray for me that
I may escape the ha~des and
the bondes of my goostly enmyes.
And whan my soule
from my body shall haue separacio~,
that I may receyue
of the great iudge sentence
of saluacion. Amen.

Aue maria.

Blyssed mother of Iesu,
whom ye iewes accused contrary
to ryghtwisnes in many
thynges by fals wytnes
in whiche he was gyltles /
pray for me, yt I may by exa~ple
of my sauyour suffre fals
report & vntrue iudgeme~t pacie~tly
& sharpe wordes, with
perfyte peace of hert and inwarde
tranquillite. Amen.

Aue maria.

Dere mother of Iesu / in
whose moost beauteous face
the iewes spytted in despyte
of hym / & in mockynge dyd
blyndfele hym / and on the
heed with theyr handes dyd
stryke hym. Praye for me,
that I may haue the wysedom
of god to knowe thynges
perteynynge to my saluacion /
and mekely to take
in this worlde mocking and
tribulacion. Amen.

Aue maria.

Dere moder of Iesu whiche
as a felon was accused yt
hath vsurped ye kyngdom of
Iury, & by fals doctryne had
ticed the people fro ye lawe of
Moyses. Pray for me that I
may lyue after the fayth and
doctrine of Christ: & receyue
the diademe of glory and the
kyngdome of Chryste in rewarde
of my lyfe. Amen.

Aue maria.

Dere moder of Iesu whiche
was sente fro~ Pylate to
Herode / & there he was had
in derision / & clothed in whyte /
in whiche tyme he kepte
scilence / and after was sent
to Pylate / praye for me that
my soule passyng in this pylgrymage
fro temptacyon to
temptacion / & fro the newe
to the olde may kepe scilence
from euyll thynkyng / & my
mouth from euyl spekyng / &
that my soule may be clothed
with the vertue of clennes &
chaste lyuynge. Amen.

Aue maria.

Blyssed mother of Iesu,
whos te~der body was bou~de
naked to a colde marble pyller /
& wt sharpe scourges his
te~der flesshe was al to torne
& lasshed. Pray for me that I
may be bounde fast to hym
by loue & holy meditacions
and for the loue of hym, and
suffre without consent strokes
of temptacion. Amen.

Aue maria.

Dere moder of Iesu who~
they crowned wt thorne, & in
scorne called hym ye kyng of
iewes knelynge afore hym /
pray for me yt my hert may be
pricked to thornes of co~punction
for yt I haue offe~ded hy~
& the: & after penau~ce I may
come to endles ioye. Amen.

Aue maria.

Dere moder of Iesu who~
the iewes dyd crye, crucifye
hym / & to ye moost shamefull
deth Pylate dyd co~dempne
hym / pray for me that I may
agaynst vyce & co~cupiscence
crucifye my flesshe wt payne
and abstynence / and helpe
good lady through thy mediacion
that I may escape the
shamefull dethe of endlesse
dampnacion. Amen.

Aue maria.

Dere moder of Iesu whiche
dyd beare ye crosse of his
deth through ye citie of Ierusalem
to the place of his passion,
pray for me that I may
by his grace mekely bere after
hym the crosse of tribulacyon /
& faythfully resyst for
his sake agaynst the blastes
of temptacion. Amen.

Aue maria.

Hayle most honourable &
louely lady / most fayre / most
swete / most vertuous / most
chaste / most pyteous / moost
blyssed & gloryous / ye purple
rose of Ierico / the shynyng
lyly of clennes / the myrrour
of vertue / the lampe of lyght
the flourysshyng palme / the
fruytful olyue / the most odoryferous
floure of vertue &
clennesse, replenysshed with
the dewe of grace celestiall /
whiche by thy moost humble
hert and shynynge chastite
hast so pleased the father of
light yt he hath electe the, the
floure of v~ginite, to be crowned
the quene of chastite / &
to all creatures art preelate
in glory / the moost specyall
medyatryce for man / by thy
merytes & contynuall supplicacyon
the multitude of synners
shall be brought to saluacion.
Ioye be to the moost
blyssed virgyn Marye, with
all honour & humble intercessyon
done to the with all
the hertes of the chyldren of
election. Amen.

Pater noster.

MOder of christ whose
moost innoce~t ha~des
and fete the iewes nayled
to a crosse wt greate strokes
that his precyous bloode dyd
streme from the woundes /
praye for me that I may perceuer
in werkes of holynes
and preuayle agaynst the spiryte,
which tempteth ye soule
to ydelnesse. Amen.

Aue maria.

Mother of christ which ha~gynge
on ye crosse prayed for
his enmyes yt crucifyed hym
sayinge. Father forgyue the~
for they know not what they
do
/ praye for me, yt I may do
good agaynst euyll / kepyng
perfyte charite for the loue
of my lorde god / and that I
may forgyue suche as haue
offended me. Amen.

Aue maria.

Mother of Chryst whiche
sayd to ye thefe hangyng on
his ryght hande: this daye yu
shalte be in paradyse with
me / pray for me that I may
perceuer ferme in thy fayth
and after the deth of my bodyly
lyfe with the au~gels of
god be brought to the ioyes
of paradyse. Amen.

Aue maria.

Mother of Chryst whiche
hangyng on ye crosse co~mended
the his moost sorowful
moder to sai~t Iohn, sayinge
to the / woman beholde thy
sone / & to saynt Iohn~ / take
kepe to thy moder / praye for
me that I may dayly co~mende
my soule to the kepynge
of the / & at the houre of deth
I beseche the in my defence
to be with me. Amen.

Aue maria.

Moder of Chryst, whiche
hangyng on the crosse cryed
to ye father. Hely hely lamaza
bathany / pray for me that I
may so crye for helpe & mercy
afore my departing, yt I may
at ye houre of deth be in surete
of euerlastyng lyfe. Ame~.

Aue maria.

Moder of Chryst whom ye
iewes gaue eysell with gall
myxte he hangyng vpon the
crosse wha~ he sayd, I thurste
Praye for me yt I may haue
goostly thurste of ye true lyfe
where is very eternite and

C.i.

by the vertue of atte~perau~ce
ouercome the spiryte of glotony.
Amen.

Aue maria.

Moder of Chryst whiche
ha~gyng on ye crosse to fulfyll
the mystery of our rede~pcion
as it was before by prophetes
prenu~ciate & sayd: now it is
ended / yt is to say / this mistery
is fully perfourmed / pray
for me yt I may be one of the
redemed chyldren / and partener
of his passyon the secrete
mystery / and by mekenes
and chastite maye preuayle
agaynst the spirites of
pryde and lechery. Amen.

Aue maria.

Moder of Chryst whiche
yelding vp his soule to the fader
and sayd. I co~mende my
spiryte in to thy ha~des / pray
for me that my soule & body
may specially be vnder ye kepynge
of the / & the vnfaythfull
people may be returned
to the fayth of Chryst dere lady
I beseche the. Amen.

Aue maria.

Moder of chryst which suffred
for vs synners most bitter
& paynfull deth / pray for me
yt I which by the merytes of
my lyfe haue deserued most
bytter deth & payne, may by
the merytes of his passyon &
thy moderly mediacion be taken
to mercy agayne. Ame~.

Aue maria.

Mother of Chryst, whose
most blyssed syde Longius ye
knyght perced with a spere /
and in co~tynent ran out water
& bloode in remyssyon of
synnes / pray for me yt I may
haue teares of co~punction &
water of penau~ce to wasshe
my soule from synne & many
great offences. Amen.

Aue maria.

Hayle ye rote of co~solacion
the refuge & succour of synners
in this lyfe of desolacio~
the patron of perfectio~ / ye well
of wysdome / the rule of prudence /
the lyght of heuen / ye
solace of soules / ye paradyse
of delite / the tree of lyfe / the
herte of true loue / the vessel
of grace, preuent by election
& perceuered by diuyne power
from all kynde of synne, originall,
mortal, and venyall /
assumpte in to the celestyall
empyre and the triumphant
cite of the trinite / transcendynge
in the immortall glory
and fragrant fruicyon of
the hygh diuinite. All the Ierarchyes
of ordres aungelical /
the sterre of direction to
all synners in poynt to perysshe
in this stormy see of
temporal tribulacion. All solace
& myrth with blysse and
beatitude be to the now and
euerlastyngly moost blyssed
virgyn Marye. Amen.

Pater noster.

MOder of the kyng of
glory / whom Ioseph
of Aromathy toke from the
crosse / and layde hym all bathed
in his blode on thy kne
moder & lady of pite pray for
me that I may fynally be taken
from the crosse of temporall
tribulacyons / and be
put in possessyon of eternall
consolacyon. Amen.

Aue maria.

Moder to ye kyng of glory
whom they anoynted precyously /
and lapped hym in his
cloth, & buryed hym reuere~tly
pray for me yt by the oyntment
of grace I may gyue
swete odour of fame, contynuynge
my lyfe in cle~nesse &
rest, as buryed in memory of
my deedly mortalite. Amen.

Aue maria.

Moder of the kyng of glorye /
whose moost holy soule
descended in to limbo the bosome
of Abraha~, & toke forth
the soules of the faders / & to
paradise ledde them, pray for
me that by thy merytes my
soule may be ye sooner taken
from the fyre of purgatory,
whiche I haue deserued by
many wayes in this synfull
and transytory lyfe. Amen.

Aue maria.

Moder of ye kynge of glory,
which dyd ryse the thyrde
day from deth to lyfe / moost
gloryous i~ his diuinite soule
and body / praye for me that
I may ryse by penaunce of
this lyfe to the eternall lyfe /
and to reigne with hym and
the in ye moost excellent ioye
and felicite. Amen.

Aue maria.

Moder of ye kyng of glory
whiche after his resurrectio~
appered to Mary magdaleyne,
Peter, and to other disciples
ye space of .xl. days / pray
for me that it wyll please his
grace that his trouth & goodnes
may appere in my soule
by his holy doctryne, with ye
vertues theological. Amen.

Aue maria.

Moder of the kyng of glory
whiche in the syght of the
& his discyples asce~ded in to
heuen / and there sytteth on
the ryght hande of ye father.
Praye for me that I may ascende
by the .xv. degrees of
contemplacion, as thou dyd
ascende in to the temple of
thy presentacion. Amen.

Aue maria.

Moder of ye kyng of glory
whiche after his ascencyon
sente downe the holy goost
to his disciples, confermyng
them in grace / pray for me yt
the holy goost may light i~ me
so by his grace yt longe tyme
I may co~tynue my lyf wtout
dampnable trespace. Ame~.

Aue maria.

Moder to ye kyng of glory
whiche at thy ascencio~ sente
the aungels fro~ heuen with
great melody to receyue the
in to the glory of ye blyssed trinite /
pray for me that I may
serue my lorde god & the & ye
au~gels so deuoutly, that after
my dethe they may leade
my soule to heuen wt myrthe
and solace ioyfully. Amen.

Aue maria.

Moder to the kyng of glory
whiche at the great dome
shall descende and gyue sentence
of dampnacion & saluacion /
pray for me that I may
ryse that daye amonge the
chyldren of the ryght hande,
and here with them the sentence
of our saluacyon / & be
delyuered for euer fro feare
of dampnacion. Amen.

Aue maria.

Moder to the kyng of glory,
whiche with the father &
the holy goost / one co~substa~cyall
god / and with the his
moost derely beloued moder
reygneth in eternall glory /
pray for me yt after this miserable
lyfe I may be brought
to the clere vision of his infynyte
glory & se the good lady
reignynge in that felicite / &
for ye great mercy shewed to
vs in this vale of misery we
may gyue louyng euerlasti~gly
to the moost excellent and
ineffable trinite. Amen.

Aue maria.

Hayle moost gloryous virgin
most meruailous i~ mekenes,
princesse peerles of true
loue & kyndnes / the quene
of heuen / ye lady of ye worlde
the empresse of hell / the contemplacyon
of aungels / the
lyght of grace / the glemyng
sterre of glorye / the delectacion
of hertes / ye rauysshyng
delyte of clennes / my herte
dere lady vnder god moost
desyreth to loue the, whiche
faithfully I offre to the with
hole desyre euery moment to
salute the. Accepte good lady
of thy maydenly benignite
these .v. roses which I haue
offred to the / not accordyngly
dere lady to thy moost excellent
dignytye / but after
myne exile and feble power
whiche desyreth some oblacion
to make acceptable to ye
reward good lady, this wyll
I beseche the whan I shall
come vnto ye celestiall kyngdome /
delyuer me from the
bondes of mortalitie. All honour /
power / worshyp / & dignitie,
with perdurable lyfe
intransitorye be to the, with
ineffable beatitude and felicite
of the moost excelle~t and
gloryous Trinite. Amen.

Pater noster. Aue
maria. Credo in deu~.