Two other deuoute prayers in Englysshe.

O BLESSYD trinyte, Fader, sone, and holy
ghoost: thre persones, and one god, I byleue
with my herte, and confesse with my mouth, al that
holy chirche bileueth and haldeth of thee: and as
moch as a good catholike and cristen man ought to
fele and bileue of thee: and I proteste here before
thi maieste, that I wyl lyue and deye in thys fayth,
and continue al my lyf. And I knowlech thee, my
good fader and maker of al the world, and me thy
poure creature, subgette, and seruaunte. And make
tho the faith and homaige of my body and of my
soule, whiche I holde of thee nobly, as of my souerain
lorde and god: with alle the goodes natural, spiritual,
and temporal, that I haue and that euer I hadde:
and that I entende to haue of thee in thys worlde
here and in that other: and wyth al my hert I
remercye and thanke thee. And in the sygne of
recognisaunce and knowleche, I paye to
thee thys lytel tribute on the mornyng, and on the
euenyng thys: that I adoure and worship thee with
hert and mouth, in feith, in hope and in charite,
wyth thys lytel oryson and prayer, whyche alle apperteyneth
to thy blessid maieste, seignorie and
diuinite, and humbly require thee of thre thynges.
The fyrst, is mercy and forgyueness of as many
euylles and vyllain synnes, as I haue doon and commysed
in thyme passed agenst thy wylle. The
secounde, plese thee to gyue me grace, that I may
serue thee and fulfille thy commaundementis, withoute
to renue ne to falle in to dedly synne. The
thyrd is, that at my deth and at my gret nede thou
wylt socoure me: and gyue me grace that I may haue
remembraunce of the blessid passion, and contricion
of my synnes: and that I may deye in thyn holy
faith, and finably may com to the glorie eternal,
wyth alle the sainctes of heuen. Amen.
O Lord god almyghty, al seeing, al thinges knowyng:
wysedom and sapience of al thing: I, poure
synner, make thys day in despite of the fende of
helle, protestation, that yf aduenture bi ony temptacion,
deception, or variacyon comyng by sorowe or
peyne or seknesse or by ony feblenesse of body:
or by ony other occasion, whatsomeuer it be, that I
falle or declyne in peril of my soule, of preiudyce of
my helthe, or in errour of the holy faith catholike:
in the whiche I was regenerate in the holy fonte of
baptesme. Lord god, in good minde, in which I
hold me nowe by thy grace wherof wyth al my
hert I thanke thee that errour wyth my power I
resiste, and here renounce, and of the same me
confesse, in protestyng that I wyll lyue and deye in
the fayth of holy chirch our moder, and thin espouse.
And in wytnesse of this confession and protestation,
and in despite of the fend of helle, I offre to thee
the Credo, in whyche alle veryte and trouthe is conteyned.
And to thee I recommaunde my soule, my
feythe, my lyf and my deth. Amen. Credo in
Deum.